«I’m Freaking Crazy». Biełaruskaja śpiavačka źniała varjacki klip u postapakaliptyčnaj łakacyi. «Jon pra siłu žančyny, jakaja choča pakarać mužčynu za zdradu»

«Anhlijskaja — bolš pra historyju, biełaruskaja — pra pačućci ad hetaj historyi. Uvieś moj novy albom vielmi kantrasny: u pačatku pieśni adlustroŭvajuć momant straty majho śvietu, bol, maju słabaść i navat momant, kali nie chočacca bolš być u hetym śviecie. A druhaja častka adlustroŭvaje, jak praz hnieŭ na kryŭdziciela naradžajecca moc — kali ty admaŭlaješsia być achviaraj i nie saromieješsia svajoj złości», — kaža jana.

Nastaśsia Rydleŭskaja zaŭsiody ździŭlaje hledača svaimi vobrazami, maskami i kaściumami. A ŭ svajoj novaj pracy Nastaśsia razam z režysiorkaj Valeryjaj Čarnaśliŭ pajšli jašče dalej i źniali, badaj što, samy varjacki klip hetaha hoda.

Heta jaje treci sinhł z novaha alboma «Alchemia», jaki vyjdzie praź miesiac. Albom, kaža śpiavačka, uvohule nie musiŭ vyjści i źjaviŭsia, na žal ci na ščaście, dziakujučy asabistamu dośviedu pieražyvańnia zdrady.

Fiška śpiavački — heta spałučeńnie anhlijskaj i biełaruskaj moŭ. Jak kaža sama Nasta, joj vielmi lohka i naturalna pišacca pa-anhlijsku, a biełaruskaja adčyniaje dźviery da bolšaj vobraznaści.

Nastaśsia Rydleŭskaja naradziłasia ŭ Minsku, ale častku rańniaha dziacinstva praviała ź siamjoj u ZŠA, paśla čaho siamja viarnułasia ŭ Biełaruś. Jana muzyka i mastačka, vystavy jakoj prachodzili ŭ Polščy, Hiermanii, Francyi, Šviejcaryi i inšych krainach.

Rydleŭskaja pačała zapisvać ułasnuju muzyku ŭ 2023 hodzie. Jana vypuściła albomy When I Can't Speak (2023) i Mugwort (2023). Jaje tvorčaść vyłučaje ŭnikalnaje spałučeńnie biełaruskich pahanskich karanioŭ, navatarskaj elektroniki i šmatsłojnych miełodyj.

Pavialičyć

Asabliva šyrokuju viadomaść joj pryniesła Dance On My Own — enierhičnaja pieśnia pra niezaležnaść, niepryniaćcie naviazanych rolaŭ i prava zastavacca saboj. Da leta 2025 hoda jana mieła bolš za 650 tysiač prasłuchoŭvańniaŭ i była samym papularnym trekam Rydleŭskaj.

 — Ci možaš užo skazać, kali vyjdzie albom «Alchemia»? Čamu takaja nazva? Heta budzie spałučeńnie žanraŭ ci jašče bolšaja suviaź ciabie jak mastački i muzyki? Kali b «Ałchimija» była nie hukam, a tvajoj karcinaj, jakija kolery ŭ joj daminavali b?

— U vieraśni, spadziajusia, 18.09.

Nazva alboma adsyłaje da transfarmacyjnaha pracesu, jaki ja pieražyła ŭ minułym hodzie i jaki dasłoŭna vymusiŭ mianie napisać hety albom — jon nie zapłanavany.

Kožnaja pieśnia pisałasia na roznych stadyjach asabistaj transfarmacyi, jakija mietafaryčna znajšli svajo ŭvasableńnie ŭ stadyjach ałchimičnaha Magnum Opus. Usie pieśni suadnosiacca z hetymi ałchimičnymi stadyjami: Nigredo, Albedo, Citrinitas, Rubedo.

Albom adlustroŭvaje moj asabisty dośvied pieražyvańnia zdrady i taho, jak ja ź joj dała rady, pryniaŭšy svoj cień i daŭšy sabie narešcie mahčymaść być saboj. Albom dazvalaje bolu i ahresii być, nie chavaje ich praz soram, dazvalaje sabie być jarkaj, mocnaj i toj, jakaja karaje, a nie płača.

Albom źviartajecca da niepryniatych patryjarchalnym śvietam mocnych žanočych archietypaŭ (klučavy vobraz — Lilit), i mienavita jon robicca šlachavodnaj zorkaj pryniaćcia siabie. Albom — pra pryniaćcie svajoj siły, upeŭnienaści i dazvoł być saboj i adčuvać śviet biez paŭmier.

Jon pra siłu žančyny, jakaja pieražyła zdradu mužčyny i nie prosta nie złamałasia, ale i maje poŭnaje prava pakarać jaho ad imia ŭsich skarystanych žančyn.

Albom pra toje, jak achviara admaŭlajecca być u słaboj pazicyi, prymaje svaju siłu i, jak ptuška fieniks, uźlataje nad usimi svaimi bolami ŭ finalnym zołacie. Hety albom natchnili hučańnie Nine Inch Nails, Led Zeppelin i hipierpop.

Heta albom poŭnaj volnaści i taho etapu, u jakim ja žyła.

Toje, što ja čuła, vylivałasia ŭ muzyku. U pačatku hetaha alboma daminuje koler srebra, a ŭ kancy — zołata. Hetyja kolery adlustroŭvajuć Vialikaje rableńnie — tuju samuju transfarmacyju sa śvincu ŭ zołata.

Śviniec, jaki zaliŭ lohkija i z-za jakoha niemahčyma było dychać… Kožnaja pieśnia nie tolki adlustroŭvaje etap ałchimičnaha pracesu, ale i maje svaju simvoliku dy svaje karciny.

Usia maja muzyka pišacca tamu, što ŭ mianie jość u joj patreba. Ja nie strymlivaju siabie nikoli i ni ŭ čym — prosta prymaju transfarmacyju i šlach, pa jakim idu i ź jakim źjaŭlajecca muzyka.

 — Dahetul tvaje treki byli, padajecca, bolš miakkimi i miełanchaličnymi: «Pusteča» nahadvaje zaklon, «Did you tell her» — niejki ciomny indzi-pop. A novy trek — heta ŭžo štości ŭ bok alternatyŭnaha elektra. Čamu jon takim atrymaŭsia? Heta ekśpierymient? Ty sprabuješ prajavić inšuju častku siabie? Ci buduć jašče treki takoha typu?

— Pieśnia «I'm Freaking Crazy» atrymałasia takoj, tamu što na momant napisańnia heta było toje, jak ja čuła siabie i śviet. Ja pisała aranžyroŭku, sprabujučy pieradać svaje adčuvańni. Nie viedaju, ci buduć jašče takija pieśni: ja adkrytaja ŭsiamu, što da mianie pryjdzie i zachoča praź mianie vyjavicca. Peŭna, u hetym albomie jana samaja varjackaja, i jana takaja adna — jakraz adkryvaje stadyju Rubedo.

 — Jak pryjšła ideja takoha klipa? Mnie nahadała «Mad Max» u dekaracyjach Uschodniaj Jeŭropy. Jakija refierensy byli? Vybuch u kancy nie sapraŭdny?

— Nakont klipa treba zapytacca ŭ režysiorki Lery Čarnaśliŭ, jak i čamu jon źjaviŭsia. Z majho boku skažu: ja nikoli nie lezu ŭ stvareńnie klipa i režysiorskaje bačańnie. Da mianie prychodziać aŭtary i prapanujuć źniać toje, što jany chacieli b. Kali mnie heta adhukajecca, ja daju zialonaje śviatło i pačynajecca kałabaracyja. Usia historyja z klipami — heta pra davier i jadnańnie tvorčych suśvietaŭ.

 — Pakul my čuli biełaruskuju i anhlijskuju movy ŭ sinhłach novaha alboma. Ty praciahnieš spałučać hetyja movy? Što ty atrymlivaješ ad kožnaj ź ich?

— Tak, u hetym albomie i dalej buduć spałučacca anhlijskaja i biełaruskaja movy. Dla mianie ciapier heta najbolš kamfortny varyjant: mnie lohka i naturalna pišacca pa-anhlijsku (heta zaŭsiody była pieršaja mova napisańnia vieršaŭ), a biełaruskaja adkryła dźviery da bolšaj vobraznaści — toj samy rehistr, jaki niedastupny anhlijskaj.

Anhlijskaja — bolš pra historyju, biełaruskaja — pra pačućci ad hetaj historyi. Albom vielmi kantrasny: u pačatku pieśni adlustroŭvajuć momant straty majho śvietu, bol, maju słabaść i navat momant, kali nie chočacca bolš być u hetym śviecie.

A druhaja častka adlustroŭvaje, jak praz hnieŭ na kryŭdziciela naradžajecca moc — kali ty admaŭlaješsia być achviaraj i nie saromieješsia svajoj złości.

• 10
• 0
• 4
• 2
• 0
• 0
• 0
• 0