Biełaruska pryviała dačku ź siniakom u polski sadok. Nieŭzabavie dzicia zabrali ź siamji

Alina pryviała trochhadovuju dačku Lizavietu (imiony źmienienyja) u polski dziciačy sadok ź siniakom pad vokam i patłumačyła, što vypadkova začapiła dzicia padčas hulni. Praź niekalki hadzin žančynu vyklikali ŭ palicyju. Da taho momantu dziaŭčynku ŭžo zabrali z sadka. Paźniej dzicia nakiravali ŭ pryjomnuju siamju, a Alinie na dva tydni zabaranili nabližacca da dački. Praz try tydni sud dazvoliŭ dziaŭčyncy viarnucca dadomu, ale kropka ŭ hetaj spravie jašče nie pastaŭlenaja. Svajoj historyjaj Alina padzialiłasia z Most.

U pačatku sakavika 2026 hoda mama i dačka hulali doma. Pavodle słoŭ Aliny, padčas hulni jana vypadkova začapiła dačku skuranym kancom ramieńčyka. Jon trapiŭ kala voka, i ŭ dziaŭčynki zastaŭsia siniak. Kali žančyna pryviała Lizavietu ŭ dziciačy sadok, jana sama pakazała siniak supracoŭnikam i patłumačyła, što adbyłosia. Alina kaža, što dziaŭčynku pryniali jak zvyčajna i zapeŭnili, što ŭsio ŭ paradku.

— Ja pajechała pa svaich spravach. Praź dźvie z pałovaj hadziny mnie patelefanavała palicyja i zaprasiła na dopyt.

U adździaleńni Alina daviedałasia, što za hety čas dzicia ŭžo ahledzieŭ doktar, i dziaŭčynku zabrali. Pavodle słoŭ žančyny, da hetaha ŭ słužbaŭ nie było padobnych pretenzij da taho, jak jana staviłasia da Lizaviety, ci paviedamleńniaŭ pra hvałt u dačynieńni da dački.

Starejšaja dačka zmahła ŭbačycca ź siastroj

Paśla taho, što adbyłosia, u dačynieńni da siamji zapuścili praceduru «Błakitnaj karty». Heta instrumient, jaki vykarystoŭvajecca ŭ Polščy dla supraćdziejańnia chatniamu hvałtu. Adnak hetym sprava nie abmiežavałasia. Lizavietu zabrali ź siamji, a palicyja asobna zabaraniła Alinie na praciahu 14 dzion nabližacca da dački bližej čym na 50 mietraŭ i kantaktavać ź joj.

U dakumiencie, ź jakim aznajomiŭsia Most, ukazana, što, pavodle acenki palicyi, pavodziny žančyny stvarali pahrozu žyćciu abo zdaroŭju dziciaci. U im idzie havorka pra ŭdar kancom ramiania ad štanoŭ u levaje voka.

— Ja nie mahła patelefanavać svajmu dziciaci, kab pahavaryć ź im.

Spačatku dziaŭčynku źmiaścili va ŭstanovu dla dziaciej, a zatym pieradali ŭ časovuju pryjomnuju siamju. Alina kaža, što sama sprabavała vyśvietlić, dzie znachodzicca dačka i što ź joj adbyvajecca.

Na nastupny dzień starejšaja dačka Aliny zmahła ŭbačycca ź Lizavietaj: zabarona na sustrečy na jaje nie raspaŭsiudžvałasia.

— U mianie [zaŭsiody] takaja adkrytaja dačka, a jana była nastolki zamknionaj. Nibyta jana hulała niejkuju rolu.

«Ja padavała zajavy praktyčna praź dzień»

Paśla taho jak Lizavietu zabrali, Alina stała damahacca mahčymaści ŭbačyć dačku i viarnuć jaje dadomu. Jana źviartałasia ŭ sud i supracoŭničała z sacyjalnymi słužbami.

Siamji pryznačyli siamiejnaha asistenta, a paźniej — sudovaha kuratara. Asistent pavinien aceńvać situacyju ŭ siamji, składać płan pracy ź joj i pry nieabchodnaści dapamahać, naprykład, sa zvarotami ŭ sud abo pošukam śpiecyjalistaŭ. Sudovy kuratar kantraluje situacyju pa daručeńni suda: jon moža prychodzić dadomu biez papiaredžańnia, razmaŭlać ź siamiejnikami i źbirać infarmacyju ŭ ludziej ź ich atačeńnia.

— Ja padavała zajavy praktyčna praź dzień. Nahadvała pra svaje pravy i pra toje, što maje zajavy pavinny razhladać hetak ža, jak zajavy inšaha boku.

Kali dvuchtydniovaja zabarona na kantakty skončyłasia, Alina ŭpieršyniu zmahła sustrecca ź Lizavietaj. Jašče praz tydzień adbyłosia sudovaje pasiadžeńnie. Sud vysłuchaŭ pradstaŭnikoŭ časovaj pryjomnaj siamji, u jakoj znachodziłasia dziaŭčynka. Pavodle słoŭ Aliny, jany raskazali, što Lizavieta była adkrytaj i kamunikabielnaj i nie stvarała ŭražańnia dziciaci, jakoje baicca maci. Sud vynies rašeńnie ab viartańni dziciaci dadomu i nahladzie kuratara za vykanańniem baćkoŭskich abaviazkaŭ.

Vyrašyła źjechać

Paśla viartańnia dziaŭčynka raz na dva tydni chadziła da dziciačaha psichołaha. Žančyna śćviardžaje, što śpiecyjalisty, jakija nazirali za siamjoj, stanoŭča aceńvali situacyju i nie ličyli znachodžańnie Lizaviety doma niebiaśpiečnym.

Tym nie mienš u žniŭni prakuratura abskardziła viartańnie dziaŭčynki dadomu, i sud pastanaviŭ źmiaścić jaje ŭ pryjomnuju siamju. Pavodle słoŭ Aliny, u dačynieńni da jaje taksama viadziecca kryminalnaja sprava z-za mierkavanaha hvałtu nad dziciem. Žančyna śćviardžaje, što ŭ palicyi joj kazali pra adsutnaść padstaŭ dla praciahu spravy i mahčymaść jaje zakryćcia.

Taksama było pryznačana psichałahičnaje daśledavańnie, jakoje pavinna acanić adnosiny maci i dački.

— Kali paćvierdzicca, što suviaź mocnaja, što dzicia mianie nie baicca, a lubić, na padstavie hetaha sud budzie vyrašać, što rabić sa spravaj dalej.

U Aliny jość niekalki viersij taho, čamu jaje siamja vyklikała takuju pilnuju ŭvahu orhanaŭ apieki. Jana padazravała praduziataje staŭleńnie da jaje jak da zamiežnicy ŭ nievialikim horadzie, dzie mihrantaŭ mała. Abo toje, što dzicia mahło zacikavić inšuju siamju. Ale nijakich paćviardžeńniaŭ hetych viersij u jaje niama.

Paśla viartańnia Lizaviety dadomu na Alinu taksama pastupiła ananimnaja skarha z-za apublikavanaha ŭ internecie rolika z dačkoj. Pavodle słoŭ žančyny, u im byli ŭkazanyja jaje imia, proźvišča, dadzienyja aŭtamabila i miesca žycharstva. Hety epizod jana taksama ŭsprymaje jak praciah cisku.

Paśla taho jak u žniŭni sud vynies druhoje pastanaŭleńnie ab źmiaščeńni Lizaviety ŭ pryjomnuju siamju, Alina pryniała rašeńnie nieŭzabavie pakinuć Polšču razam ź dziciem, nie čakajučy zakančeńnia raźbiralnictva.

• 3
• 1
• 0
• 17
• 11
• 5
• 7
• 0