Cukierbierh apisaŭ u ese svajo bačańnie raźvićcia štučnaha intelektu

U ciapierašni čas Meta adstaje ŭ honcy štučnaha intelektu i sprabuje dahnać Anthropic i OpenAI, jakija vałodajuć samymi daskanałymi madelami štučnaha intelektu.

Adkryty zychodny kod

Meta adnaŭlaje vypusk madelaŭ z adkrytymi paramietrami (dastupnymi dla spampoŭvańnia), ad čaho časova admoviłasia paśla letašniaj rearhanizacyi svajho ŠI-padraździaleńnia. Cukierbierh taksama abaraniaje praktyku dystylacyi (kali raspracoŭščyki vučacca ŭ čužych madelaŭ praz zapyty) — jon ličyć jaje narmalnaj formaj navučańnia na tym, što možna nazirać.

Bolš hrošaj dla haradoŭ pablizu data-centraŭ

Kampanija zapuskaje fond «Future Is For Everyone Fund» na $1 miljard dla padtrymki miascovych supolnaściej pobač z data-centrami — častkova jak adkaz na narastajučuju niezadavolenaść aktyvistaŭ takimi prajektami.

Cukierbierh taksama napisaŭ, što adzin ź niedachopaŭ ZŠA ŭ ich baraćbie z Kitajem za raspracoŭku zvyšrazumnych kampjutarnych sistem — składanaść stvareńnia infrastruktury na terytoryi ZŠA. Sioleta Meta płanuje ŭkłaści da 145 miljardaŭ dalaraŭ u kapitalnyja ŭkładańni, u asnoŭnym na budaŭnictva centraŭ apracoŭki danych, i 600 miljardaŭ dalaraŭ da 2028 hoda.

Rańniaje padklučeńnie dziaržavy da raspracoŭki madelaŭ

Cukierbierh krytykuje ciapierašni 30‑dzionny dobraachvotny pieryjad pravierki novych madelaŭ jak zanadta doŭhi dla tempaŭ raźvićcia ŠI. Zamiest žorstkaha rehłamientu jon prapanuje ciesnaje supracoŭnictva łabaratoryj z uładami ZŠA, uklučajučy pieradaču pramiežkavych kantrolnych punktaŭ navučańnia jašče da jaho zaviaršeńnia.

Bolš unutranaha kantrolu za relizami, u tym liku ŭ Meta

Meta ŭvodzić novuju strukturu kiravańnia: saviet dyrektaraŭ atrymlivaje prava aceńvać, ci adpaviadajuć novyja madeli zaćvierdžanym kryteryjam biaśpieki. Cukierbierh zajaŭlaje, što nie ličyć pravilnym, kab rašeńnie pra razhortvańnie supierintelektu prymaŭ adzin čałaviek, i zaklikaje inšyja kampanii i ŭsiu industryju pieraniać taki padychod.

Karystalniki musiać vyznačać formu ŠI

Raźvivajučy kancepcyju «piersanalnaha supierintelektu», Cukierbierh nastojvaje, što mienavita karystalniki, a nie raspracoŭščyk madeli, musiać vyrašać, jakija kaštoŭnaści zakładać u sistemu. Jon taksama abiacaje całkam pryvatny režym dla piersanalnych ŠI-ahientaŭ, da danych jakoha nie budzie dostupu navat u samoj Meta.

• 3
• 0
• 1
• 2
• 1
• 0
• 0
• 0