The state o the Democratic Republict o the Congo maun gar a body greet. Fae 2012, the kintra haes been tore in twa throu weir, an is noo in terrification throu the ootbrek o Ebola. In 2012 sodgers o the Mairch 23 Movement brak awa fae the government ower the heid o sindry maiters, an took ower easter pairts o the kintra, the cities o Goma an Bakavu comprehendit. This haes led tae ongauin weirfare an up tae seeven million fowk hameless an flittin aboot. An noo the Bundibugyo virus is at the root o the Ebola ootbrek an haes spreid ower the bygane three month throu mony pairts, an even the length o Kampala in the neeborin Republict o Ugandie. Ebola spreids throu contact wi smitten body bree or fluid, an at the hinnerend causes the deith o organs an bleedin baith inwardly an ootwardly. It is, tae date, the second warst ootbrek recordit, but the can o the health services haes been hinnert throu the weirfare, the want o health care an laborators, an throu the muckle nummers o flittin fowk smittin ane anither. The affcome is that the smit is affen aheid o ony ettles at owerance, an ower 5,200 cases haed been recordit bi late August 2026. The WHO haes statit that aboot 90 fowk a day took the disease in the first three month, wi the province o Ituri in the Congo haein 79% o aw deiths. As it stauns, the’r nae estaiblisht vaccine agin Bundibugyo but medical speirars haes been dargin on fower sindry kinds tae prove on humans.

Photie o the Ebola virus bi Tom Pearl Desciple.