Axencia Espacial Europea
L'Axencia Espacial Europea (n'inglés: European Space Agency; en francés: Agence spatiale européenne; embrivida ESA) ye una organización internacional intergubernamental dedicada a la cooperación ente los países europeos nel ámbitu espacial. La so misión ye desenvolver les capacidaes espaciales d'Europa y garantizar que la inversión nel espaciu produz beneficios científicos, tecnológicos, económicos y sociales.[1]
Creada en 1975 a partir de la Organización Europea pa la Investigación Espacial (ESRO) y la Organización Europea pal Desarrollu de Llanzadores (ELDO), la ESA tien 23 Estaos miembros dende la incorporación d'Eslovenia el 1 de xineru de 2025.[2] Canadá participa en dellos programes en virtú d'un alcuerdu de cooperación, ente que Chipre, Eslovaquia, Letonia y Lituania son miembros asociaos.[2]
La sede principal de la organización ta en París, Francia, y la ESA dispón de centros especializaos en distintos países europeos. Emplega unes 3.000 persones nos sos distintos centros ya instalaciones.[3] El direutor xeneral ye l'austriacu Josef Aschbacher, nel cargu dende 2021.[1]
Les actividaes de la organización inclúin la ciencia espacial, la esploración humana y robótica del espaciu, la observación terrestre, les telecomunicaciones, la navegación por satélite, el desenvolvimientu de llanzadores, la seguridá espacial y la investigación y desenvolvimientu de tecnoloxíes espaciales.[1]
Historia
[editar | editar la fonte]Oríxenes
[editar | editar la fonte]Tres el desenvolvimientu de los primeros programes espaciales de los Estaos Xuníos y la Xunión Soviética, dellos países europeos empezaron a plantegar la creación d'organizaciones comunes que permitieren concentrar recursos científicos, industriales y económicos.
En 1962 firmáronse les convenciones pa crear dos organizaciones distintes: la Organización Europea pa la Investigación Espacial (ESRO), orientada principalmente a la investigación científica mediante satélites, y la Organización Europea pal Desarrollu de Llanzadores (ELDO), dedicada al desenvolvimientu d'un vehículu de llanzamientu européu.[4] Les convenciones de dambes organizaciones entraron a valir en 1964.[5]
La ESRO desenvolvió los sos primeros satélites científicos, ente ellos ESRO-2B, dedicáu al estudiu de los rayos cósmicos y los rayos X solares, y HEOS-1, dedicáu al estudiu del vientu solar y l'espaciu interplanetariu.[6]
A principios de la década de 1970, los países participantes decidieron concentrar les actividaes espaciales europees nuna única organización. La Conferencia Espacial Europea de xunetu de 1973 llegó a alcuerdos sobre'l desenvolvimientu de Spacelab, el llanzador que posteriormente recibiría'l nome d'Ariane y un satélite de comunicaciones marítimes, amás de la creación d'una nueva axencia espacial europea.[7]
Creación de la ESA
[editar | editar la fonte]La Convención pola que se creó l'Axencia Espacial Europea abrióse a la firma en París el 30 de mayu de 1975. Esi día firmáronla Alemaña Occidental, Bélxica, Dinamarca, España, Francia, Italia, Países Baxos, Reinu Xuníu, Suecia y Suiza. Irlanda firmó la Convención'l 31 d'avientu del mesmu añu.[8]
La ESA empezó a funcionar de facto'l 31 de mayu de 1975, continuando les actividaes de la ESRO y la ELDO. La Convención entró formalmente a valir el 30 d'ochobre de 1980, tres completase'l procesu de ratificación polos Estaos fundadores.[8]
Dende entós incorporáronse nuevos países: Austria y Noruega en 1986, Finlandia en 1995, Portugal en 2000, Grecia y Luxemburgu en 2005, Chequia en 2008, Rumanía en 2011, Polonia en 2012, Estonia y Hungría en 2015 y Eslovenia en 2025.[4]
Organización
[editar | editar la fonte]El Conseyu de l'Axencia Espacial Europea ye l'órganu de gobiernu de la organización. Cada Estáu miembru ta representáu nel Conseyu y dispón d'un votu, independientemente del so tamañu o de la so contribución económica.[1]
Al frente de la organización ta'l direutor xeneral, escoyíu pol Conseyu por un periodu de cuatro años. Dende'l 1 de marzu de 2021, el cargu ta ocupáu por Josef Aschbacher.[1]
Les actividaes obligatories, qu'inclúin el programa de ciencia espacial y el presupuestu xeneral, financienles tolos Estaos miembros mediante contribuciones calculaes principalmente en función del so productu nacional brutu. Los programes opcionales permiten a cada Estáu decidir en qué actividaes participa y la cuantía de la so contribución.[1]
Otra de les característiques del sistema de financiación ye'l principiu de retornu xeográficu, pol que se procura que'l valor de los contratos industriales concedíos en cada Estáu miembru guarde rellación cola contribución económica d'esi país a los programes de l'Axencia.[1]
Estaos miembros
[editar | editar la fonte]Dende'l 1 de xineru de 2025, la ESA ta formada por 23 Estaos miembros:[2]
| País | Incorporación | Observaciones |
|---|---|---|
 Alemaña |
30 de mayu de 1975 | Miembru fundador |
 Bélxica |
30 de mayu de 1975 | Miembru fundador |
 Dinamarca |
30 de mayu de 1975 | Miembru fundador |
 España |
30 de mayu de 1975 | Miembru fundador |
 Francia |
30 de mayu de 1975 | Miembru fundador |
 Italia |
30 de mayu de 1975 | Miembru fundador |
 Países Baxos |
30 de mayu de 1975 | Miembru fundador |
 Reinu Xuníu |
30 de mayu de 1975 | Miembru fundador |
 Suecia |
30 de mayu de 1975 | Miembru fundador |
 Suiza |
30 de mayu de 1975 | Miembru fundador |
 Irlanda |
31 d'avientu de 1975 | Miembru fundador |
 Austria |
1986 | |
 Noruega |
1986 | |
 Finlandia |
1995 | |
 Portugal |
2000 | |
 Grecia |
2005 | |
 Luxemburgu |
2005 | |
 Chequia |
2008 | |
 Rumanía |
2011 | |
 Polonia |
2012 | |
 Estonia |
2015 | |
 Hungría |
2015 | |
 Eslovenia |
1 de xineru de 2025 | Miembru más recién |
La pertenencia a la ESA ye independiente de la pertenencia a la Xunión Europea. Noruega, Suiza y el Reinu Xuníu son miembros de la ESA ensin pertenecer a la Xunión Europea.[2]
Amás de los Estaos miembros, Chipre, Eslovaquia, Letonia y Lituania tienen l'estatus de miembros asociaos. Canadá participa en dellos programes y nel Conseyu de la ESA en virtú d'un alcuerdu de cooperación, ente que Bulgaria, Croacia y Malta tienen alcuerdos de cooperación cola Axencia.[2]
Centros ya instalaciones
[editar | editar la fonte]La sede de la ESA ta en París. La organización dispón amás de centros especializaos distribuyíos por Europa:[9]
- ESTEC (European Space Research and Technology Centre), en Noordwijk, Países Baxos, ye'l principal centru técnicu de la organización y encárgase de la preparación y xestión técnica de los proyectos espaciales.
- ESOC (European Space Operations Centre), en Darmstadt, Alemaña, encárgase del control de naves y de les operaciones de misiones espaciales.
- ESRIN, en Frascati, Italia, especialízase n'observación terrestre y xestiona segmentos terrestres y archivos de datos ambientales.
- EAC (European Astronaut Centre), en Colonia, Alemaña, ye'l centru de preparación y sofitu médicu de los astronautes europeos.
- ESAC (European Space Astronomy Centre), en Villanueva de la Cañada, España, acueye centros d'operaciones científiques y archivos de misiones d'astronomía y esploración planetaria.
- ECSAT (European Centre for Space Applications and Telecommunications), en Harwell, Reinu Xuníu, desenvuelve actividaes relacionaes coles telecomunicaciones, aplicaciones integraes, observación terrestre, ciencia y tecnoloxía.
- ESEC (European Space Security and Education Centre), en Redu, Bélxica, concentra actividaes de seguridá espacial, meteoroloxía espacial, educación y operaciones de misiones.[9]
A estes instalaciones súmase'l Centru Espacial Guayanés, en Kourou, Guayana Francesa, que funciona como principal puertu espacial européu y base de llanzamientu de los cohetes Ariane 6 y Vega-C.[9]
Actividaes
[editar | editar la fonte]Ciencia espacial
[editar | editar la fonte]La investigación científica constitúi ún de los ámbitos históricos del programa de la Axencia. Ente les misiones d'astronomía y física espacial desarrollaes a lo llargo de la so historia tán Hipparcos, SOHO, XMM-Newton, Integral, Planck, Gaia y Euclid. Europa participa amás en grandes proyectos internacionales como'l Telescopiu espacial Hubble y el Telescopiu Espacial James Webb.
El programa científicu estiéndese a la investigación del Sistema Solar, con misiones como Giotto, Ulysses, Mars Express, Venus Express, Rosetta, BepiColombo y JUICE.
Observación terrestre
[editar | editar la fonte]La observación de la Tierra ye otra de les principales actividaes de l'Axencia. Les misiones ERS-1, ERS-2 y Envisat establecieron series de datos sobre océanos, atmósfera, xelu y superficies continentales.
Dende entós, esti ámbitu amplióse notablemente. En cooperación cola Comisión Europea desenvuélvese'l programa Copernicus, que dispón de la familia de satélites Sentinel. A ello súmense les misiones científiques d'observación terrestre del programa Earth Explorer, ente elles GOCE, CryoSat-2, SMOS, Swarm y Aeolus.
Navegación
[editar | editar la fonte]Nel ámbitu de la navegación por satélite, la ESA participa coles instituciones de la Xunión Europea nel desenvolvimientu del sistema mundial Galileo y del sistema européu d'aumentación EGNOS.
Telecomunicaciones
[editar | editar la fonte]El desenvolvimientu de tecnoloxíes de telecomunicaciones por satélite forma parte de les actividaes de l'Axencia dende los primeros años de la organización. Los programes d'esti ámbitu tienen como oxetivu desenvolver y demostrar nueves tecnoloxíes de comunicaciones espaciales y favorecer la so incorporación al sector comercial.
Ente los proyectos históricos figura'l satélite Artemis, utilizáu pa probar comunicaciones óptiques ente satélites y tecnoloxíes de retransmisión de datos. Más recientemente, el European Data Relay System (EDRS) permite tresmitir grandes cantidaes de datos ente satélites n'órbita baxa y estaciones terrestres mediante terminales láser.
Tresporte espacial
[editar | editar la fonte]L'accesu européu al espaciu articulóse principalmente alredor de la familia de cohetes Ariane y de los llanzadores Vega, desarrollaos con participación de la ESA.
El programa Ariane empezó na década de 1970 como parte del procesu de creación d'una capacidá europea independiente de llanzamientu. El primer Ariane 1 despegó'l 24 d'avientu de 1979, dando orixe a una familia de llanzadores que tuvo como versiones posteriores Ariane 2, Ariane 3, Ariane 4 y Ariane 5.
El 9 de xunetu de 2024 realizóse'l primer vuelu del Ariane 6, nueva xeneración de llanzadores pesaos europeos.[10]
La familia Vega complementa a Ariane nel tresporte de cargues de menor tamañu. La variante Vega-C realizó'l so primer vuelu en 2022 y volvió al serviciu en 2024 tres les modificaciones realizaes dempués del fallu del so segundu vuelu.
Vuelu espacial tripuláu y esploración
[editar | editar la fonte]La participación europea en programes de vuelu espacial tripuláu remóntase a los años 1980. Ún de los primeros grandes proyectos nesti ámbitu foi'l llaboratoriu Spacelab, desarrolláu pal programa del transbordador espacial de la NASA. Anguaño, la ESA ye ún de los socios de la Estación Espacial Internacional.
Ente les principales contribuciones europees a la estación ta'l llaboratoriu Columbus, amás d'otros componentes ya instalaciones. Ente 2008 y 2015, el Vehículu Automatizáu de Tresferencia (ATV) utilizóse pa llevar suministros, combustible, agua y otros materiales a la estación.
Los astronautes de los Estaos miembros intégrense nel Cuerpu Européu d'Astronautes y prepárense principalmente nel Centru Européu d'Astronautes de Colonia.
La participación nel programa Artemis de la NASA materialízase principalmente nel Módulu de Serviciu Européu, que proporciona propulsión, enerxía eléctrica, agua, osíxenu y control térmicu a la nave Orión.
Seguridá espacial
[editar | editar la fonte]La seguridá espacial constitúi otra de les árees d'actividá de l'Axencia, con programes dedicaos a la detección y siguimientu de basoria espacial, la meteoroloxía espacial y la defensa planetaria.
Ente les misiones d'esti ámbitu ta Hera, destinada a estudiar los efectos del impactu de la misión d'Estaos Xuníos DART sobre Dimorphos, satélite del asteroide 65803 Didymos. La misión forma parte de los estudios de defensa planetaria destinaos a conocer les posibilidaes de modificar la trayectoria d'un asteroide potencialmente peligrosu.
Cooperación internacional
[editar | editar la fonte]La cooperación internacional ye una parte importante de les actividaes de l'Axencia. A lo llargo de la so historia, numberoses misiones desarrolláronse con otres axencies espaciales y organizaciones científiques. La NASA foi ún de los principales socios, con proyectos conxuntos o participaciones europees en misiones como'l Telescopiu espacial Hubble, Cassini-Huygens, SOHO y el Telescopiu Espacial James Webb.
La collaboración estiéndese a otres axencies espaciales. BepiColombo, por exemplu, ye una misión conxunta cola Axencia Xaponesa d'Esploración Aeroespacial (JAXA), ente qu'otros programes d'esploración humana y robótica tienen tamién participación internacional.
Especial relevancia tien la rellación institucional cola Xunión Europea. Anque la ESA y la Xunión Europea son organizaciones independientes y tienen miembros distintos, dambes collaboren estrechamente nel desenvolvimientu del programa espacial européu, especialmente en programes como Galileo y Copernicus.[2]
Ver tamién
[editar | editar la fonte]Referencies
[editar | editar la fonte]- 1 2 3 4 5 6 7 «Datos de la ESA». Axencia Espacial Europea. Consultáu'l 26 d'agostu de 2026.
- 1 2 3 4 5 6 «Member States & Cooperating States» (inglés). Axencia Espacial Europea. Consultáu'l 26 d'agostu de 2026.
- ↑ «Frequently asked questions» (inglés). Axencia Espacial Europea. Consultáu'l 26 d'agostu de 2026.
- 1 2 «ESA Convention booklet» (inglés). Axencia Espacial Europea. Consultáu'l 26 d'agostu de 2026.
- ↑ «Forty-five years of the ESA Convention» (inglés). Axencia Espacial Europea (30 de mayu de 2020). Consultáu'l 26 d'agostu de 2026.
- ↑ «Key dates 1960-2026» (inglés). Axencia Espacial Europea. Consultáu'l 26 d'agostu de 2026.
- ↑ «European Space Conference, 1975» (inglés). Axencia Espacial Europea. Consultáu'l 26 d'agostu de 2026.
- 1 2 «ESA Convention» (inglés). Axencia Espacial Europea. Consultáu'l 26 d'agostu de 2026.
- 1 2 3 «Establishments and facilities» (inglés). Axencia Espacial Europea. Consultáu'l 26 d'agostu de 2026.
- ↑ «Key dates 1960-2026» (inglés). Axencia Espacial Europea. Consultáu'l 26 d'agostu de 2026.
Enllaces esternos
[editar | editar la fonte]
Wikimedia Commons acueye conteníu multimedia sobre Axencia Espacial Europea.
- Páxina oficial de l'Axencia Espacial Europea
| Control d'autoridaes |
|
|---|
Datos: Q42262- Multimedia: European Space Agency